RGV: చిరు, హైపర్‌ ఆదిపై ఆర్జీవీ సెటైర్లు.. ఎంత దూరం ఉంటే అంత మంచిదంటూ కౌంటర్లు..

RGV: ఓ సినిమా గురించి ఇండస్ట్రీతో పాటు రాజకీయం కూడా మాట్లాడుకుంటుంది అంటే అది కచ్చితంగా మెగాస్టార్ మూవీ అయి ఉంటుంది. భోళా శంకర్ విషయంలో అదే జరుగుతోంది. ఇండస్ట్రీ వాళ్లు.. రాజకీయం తెలిసిన వాళ్లు.. రాజకీయాల్లో ఉన్న వాళ్లు.. అంతా ఈ సినిమా గురించే మాట్లాడుకుంటున్నారు. ఎవరి కామెంట్ల సంగతి ఎలా ఉన్నా.. ఇప్పుడు కాంట్రవర్షియల్ డైరెక్టర్‌ ఆర్జీవీ వ్యాఖ్యలు మాత్రం భోళా శంకర్ టీమ్‌ను ఓ ఆట ఆడేసుకుంటున్నాయి.

మెగా ఫ్యామిలీలో ఇన్నాళ్లు ఎప్పుడూ పవన్‌ను మాత్రమే టార్గెట్ చేసిన రాంగోపాల్‌ వర్మ.. ఫస్ట్ టైమ్ చిరు మీద కామెంట్‌ చేశాడు. భోళా శంకర్ మూవీ మీద సెటైర్ల మీద సెటైర్లు గుప్పించాడు. భజనకు అలవాటు పడిపోయిన చిరంజీవి రియాలిటీకి దూరంగా ఉంటున్నారని, చురకలు అంటించాడు. పనిలో పనిగా హైపర్ ఆదిని కూడా ఓ ఆట ఆడుకున్నాడు ఆర్జీవీ. భోళా శంకర్ సినిమా ప్రీ రిలీజ్ ఈవెంట్‌లో చిరంజీవిపైన హైపర్ ఆది ప్రశంసల వర్షం కురిపించాడు. ఆ మాటలపై కూడా ఆర్జీవీ పంచ్‌లు వేశాడు. జబర్‌ హైపర్‌లాంటి ఆస్థాన విదూషకుల పొగడ్తలకు అలవాటు పడిపోయి.. రియాలిటీకి మెగా దూరం అవుతున్నారని అనిపిస్తోంది అంటూ ట్వీట్‌ చేశాడు. ఇక్కడితో ఆగాడా అంటే.. తన పోస్టును తానే షేర్ చేసుకుంటూ ఇంకొన్ని మాటలు రాసుకొచ్చాడు.

పొగడ్తలతో ముంచే వాళ్ళ బ్యాచ్ కన్నా ప్రమాదకరమైన వాళ్ళు ఎవరు ఉండరని.. రియాలిటీ తెలిసేలోపు రాజుగారు మునిగిపోతారని అంటూ.. వాళ్ళ పొగడ్తల నుంచి తప్పించుకోవాలంటే వారిని ఒక మైలు దూరం పెట్టడమే మంచిదని సలహా ఇచ్చాడు వర్మ. ఈ ట్వీట్ ఇప్పుడు తెగ వైరల్ అవుతోంది.