ఆసీస్ గడ్డపై ఒకే ఒక్కడు బుమ్రా రికార్డుల మోత

ఆస్ట్రేలియా టూర్ లో భారత స్టార్ పేసర్ జస్ప్రీత్ బూమ్రా తన సూపర్ ఫామ్ కొనసాగిస్తున్నాడు. సహచర బౌలర్ల నుంచి సరైన సపోర్ట్ లేకున్నా… తాను ఒక్కడే తనదైన పేస్ తో ప్రత్యర్థి జట్టును కంగారుపెడుతున్నాడు. తొలి రెండు టెస్టుల్లో అదరగొట్టిన బుమ్రా ఇప్పుడు గబ్బాలోనూ సత్తా చాటాడు. తొలి ఇన్నింగ్స్ లో 6 వికెట్లతో ఆసీస్ బ్యాటర్లపై ఆధిపత్యం కనబరిచాడు. మిగిలిన బౌలర్లు విఫలమైనా బుమ్రా మాత్రం తన బౌలింగ్ తో జట్టును కాపాడాడు. సెంచ‌రీలతో చెల‌రేగిన ట్రావిస్ హెడ్‌, స్మిత్ వంటి కీల‌క వికెట్లును ప‌డ‌గొట్టి భార‌త్‌ను తిరిగి గేమ్‌లోకి తీసుకువ‌చ్చాడు. కానీ బ్యాట‌ర్లు మ‌రోసారి చేతులెత్తేయడంతో టీమిండియాకు క‌ష్టాలు త‌ప్ప‌లేదు.
ఈ మ్యాచ్‌లో 6 వికెట్ల‌తో చెల‌రేగిన బుమ్రా ప‌లు అరుదైన రికార్డుల‌ను తన ఖాతాలో వేసుకున్నాడు.

ఆస్ట్రేలియాపై గ‌డ్డ‌పై అత్య‌ధిక టెస్టు వికెట్లు ప‌డ‌గొట్టిన రెండో భార‌త బౌల‌ర్‌గా బుమ్రా రికార్డులకెక్కాడు. ఈ క్ర‌మంలో టీమిండియా స్పిన్ దిగ్గ‌జం అనిల్ కుంబ్లే రికార్డును బ్రేక్ చేశాడు. బుమ్రా ఇప్ప‌టివ‌ర‌కు ఆస్ట్రేలియాలో 50 టెస్టు వికెట్లు వికెట్లు ప‌డ‌గొట్ట‌గా.. కుంబ్లే 49 వికెట్లు సాధించాడు. ఇక ఈ అరుదైన ఫీట్ సాధించిన జాబితాలో భార‌త మాజీ కెప్టెన్ క‌పిల్ దేవ్‌ అగ్ర‌స్ధానంలో ఉన్నాడు. బుమ్రా మ‌రో రెండు వికెట్లు ప‌డ‌గొడితే క‌పిల్ ఆల్‌టైమ్ రికార్డును బ్రేక్ చేస్తాడు. ఇదిలా ఉంటే ఈ మ్యాచ్‌లో ఆసీస్ స్టార్ బ్యాట‌ర్‌ను ఔట్ చేసిన బుమ్రా త‌న 190వ టెస్టు వికెట్‌ను ఖాతాలో వేసుకున్నాడు. త‌ద్వారా టెస్టుల్లో 20 కంటే తక్కువ సగటుతో 191 వికెట్లు తీసిన తొలి బౌలర్‌గా బుమ్రా వరల్డ్‌ రికార్డు సృష్టించాడు. బుమ్రా 19.82 స‌గ‌టుతో 191 వికెట్లను ప‌డ‌గొట్టాడు. ఈ సిరీస లో బుమ్రా ఇప్పటి వరకూ 18 వికెట్లు తీశాడు. ప్రస్తుతం సిరీస్ లో అత్యధిక వికెట్ల జాబితాలో బుమ్రానే టాప్ ప్లేస్ లో కొనసాగుతున్నాడు.