యువ ఆటగాళ్ల ఎంట్రీగా 2024, భారత జట్టులో కొత్త ముఖాలు

మరికొద్ది రోజుల్లో కొత్త సంవత్సర వేడుకలు ప్రారంభం కాబోతున్నాయి. ఈ ఏడాది క్రికెట్ ఫ్యాన్స్ కు మిశ్రమ సంవత్సరంగా మిగిలిపోయింది. గతేడాది చివర్లో వన్డే ప్రపంచకప్‌ను కోల్పోయిన టీమిండియా.. ఈ ఏడాది టీ20 ప్రపంచకప్‌ టైటిల్‌ను కైవసం చేసుకుంది. ప్రపంచకప్ గెలిచిన వెంటనే రోహిత్ శర్మ, విరాట్ కోహ్లీలు టీ20 ఇంటర్నేషనల్‌కు వీడ్కోలు పలికి అభిమానుల హృదయాలను బద్దలు కొట్టారు. ఈ ఏడాది టీమిండియాలో చాలామంది క్రికెట్ కు వీడ్కోలు పలకగా కొందరు యువ క్రికెటర్లు అంతర్జాతీయ క్రికెట్లోకి అరంగేట్రం చేశారు.

2024లో 8 మంది టీ20 ఇంటర్నేషనల్‌లో, ఒకరు వన్డేలో, ఏడుగురు టెస్టుల్లో అరంగేట్రం చేశారు. ఈ ఏడాది ప్రారంభంలో ఇంగ్లండ్ 5 టెస్టుల సిరీస్ కోసం భారత్‌లో పర్యటించింది. ఈ సిరీస్‌లో చాలా మంది కొత్త ముఖాలకు అవకాశం దక్కింది. ఈ సిరీస్‌లో రెండో టెస్టు మ్యాచ్‌లో రజత్ పాటిదార్‌కి అరంగేట్రం చేసే అవకాశం లభించింది. సిరీస్‌లో మూడో టెస్టు రాజ్‌కోట్‌లో జరిగింది. ఈ మ్యాచ్‌లో ధృవ్ జురెల్, సర్ఫరాజ్ ఖాన్‌లకు అరంగేట్రం చేసే అవకాశం లభించింది. దీని తర్వాత, ఫాస్ట్ బౌలర్ ఆకాష్‌దీప్ తన టెస్ట్ కెరీర్‌ను రాంచీ టెస్టులో ప్రారంభించగా, దేవదత్ పడిక్కల్ ధర్మశాలలో తన టెస్ట్ కెరీర్‌ను ప్రారంభించాడు. బోర్డర్ గవాస్కర్ ట్రోఫీ కోసం భారత జట్టు ఈ ఏడాది చివర్లో ఆస్ట్రేలియా వెళ్లింది. సిరీస్‌లో తొలి టెస్టు పెర్త్‌లో జరిగింది. ఈ మ్యాచ్‌లో హర్షిత్ రాణా, నితీష్ రెడ్డిలు అరంగేట్రం చేశారు.

ఓవరాల్ గా చూసుకుంటే ఈ ఏడాది టెస్టుల్లో అరంగేట్రం చేసిన వారిలో రజత్ పాటిదార్, ధృవ్ జురెల్, సర్ఫరాజ్ ఖాన్, ఆకాష్ డీప్, దేవదత్ పడిక్కల్, హర్షిత్ రాణా, నితీష్ కుమార్ రెడ్డి ఉన్నారు. ఇక అంతర్జాతీయ టీ20 విషయానికి వస్తే.. ఈ ఏడాది భారత జట్టు జింబాబ్వేలో పర్యటించింది. శుభ్‌మన్ గిల్ సారథ్యంలో ఈ టూర్‌కు యువ జట్టు ఎంపికైంది. జింబాబ్వే పర్యటనలో అభిషేక్ శర్మ, ధృవ్ జురెల్, ర్యాన్ పరాగ్, బి సాయి సుదర్శన్ మరియు తుషార్ దేశ్‌పాండే టి20 అంతర్జాతీయ అరంగేట్రం చేశారు. దీని తర్వాత బంగ్లాదేశ్ జట్టు భారత్ కు వచ్చినప్పుడు, నితీష్ కుమార్ రెడ్డి, మయాంక్ యాదవ్ మరియు రమణదీప్ సింగ్ సెంచూరియన్‌లో అరంగేట్రం క్యాప్‌ను అందుకున్నారు. ఇక ఈ ఏడాది రియాన్ పరాగ్ ఒక్కడే వన్డేల్లో అరంగేట్రం చేశాడు.