పాకిస్తాన్ తో తొలి వన్డే, ఆస్ట్రేలియాదే విజయం

ఆస్ట్రేలియా టూర్ ను పాకిస్థాన్ జట్టు ఓటమితో ఆరంభించింది. మెల్ బోర్న్ వేదికగా జరిగిన తొలి వన్డేలో పరాజయం పాలైంది. బౌలర్ల హవా కొనసాగిన ఈ మ్యాచ్ లో ఆసీస్ 2 వికెట్ల తేడాతో గెలిచింది. మొదట బ్యాటింగ్ కు దిగిన పాక్ జట్టు 203 పరుగులకు ఆలౌటైంది. 117 పరుగులకే 6 వికెట్లు కోల్పోయిన పాక్ ను నసీమ్ షా, షాహీన్ అఫ్రిది ఆదుకున్నారు. అయితే ఛేజింగ్ లో ఆసీస్ కూడా తడబడింది. స్టీవ్ స్మిత్ , జోస్ ఇంగ్లిస్ రాణించడంతో ఆదుకున్నా.. చివర్లో వరుస వికెట్లు కోల్పోయింది. ఈ దశలో ప్యాట్ కమ్మిన్స్ కెప్టెన్ ఇన్నింగ్స్ ఆడాడు. 31 బంతుల్లో 32 పరుగులు చేసి జట్టును గెలిపించాడు. ఫలితంగా ఆసీస్ మరో 16 ఓవర్లు మిగిలుండగా టార్గెట్ అందుకుంది. ఈ విజయంతో మూడు వన్డేల సిరీస్ లో 1-0 ఆధిక్యంలో నిలిచింది.