Dogs Aadhaar cards ఢిల్లీలో కుక్కలకు ఆధార్‌ కార్డులు.. ఎందుకో తెలిస్తే షాకవుతారు

దేశ రాజధాని ఢిల్లీ (Delhi) లో కుక్కలకూ ఆధార్ కార్డ్‌లు (Aadhaar Card) ఇస్తున్నారు. ఇప్పటికే 100 కుక్కలకు ఈ కార్డ్‌లు జారీ చేశారు అధికారులు. కుక్కలేంటి ఆధార్‌ కార్డ్‌లేంటి అనిపిస్తుంది కదా. దీని వెనక ఓ పెద్ద కథ ఉంది. ఈ మధ్య వీధి కుక్కలు రోడ్లపై వచ్చి పోయే వాళ్లపై దాడులు చేస్తున్నాయి. ఈ బాధ భరించలేక చాలా మంది వాటిపై దాడి చేస్తున్నారు. కొందరైతే వాటిని చంపేస్తున్నారు కూడా. ఈ ముప్పు నుంచి తప్పించేందుకు పావ్‌ఫ్రెండ్‌ అనే స్వచ్ఛంద సంస్థ ఈ ఐడియా ఇచ్చింది. వీధి కుక్కలకు క్యూ ఆర్‌ కోడ్‌తో ఉండే ఆధార్‌ కార్డ్‌లు మెడలో వేసింది.

ఆ కార్డ్‌ల ద్వారా అవి ఎక్కడికి వెళ్లినా ట్రేస్ చేయడానికి వీలుంటుంది. ఒకవేళ అవి కనిపించకుండా పోయినా ఎక్కడున్నాయో కనిపెట్టొచ్చు. ఇప్పటి వరకూ ఇలా 100 వీధి కుక్కలకు ఆధార్‌ కార్డ్‌లు జారీ చేసింది ఈ ఎన్జీవో. ఢిల్లీ టర్మినల్ ఎయిర్‌పోర్ట్, ఇండియా గేట్, ఢిల్లీ సహా పలు ప్రాంతాల్లోని కుక్కలకు ఈ కార్డ్‌లు మెడలో వేశారు. ఈ కుక్కల మెడలో ఉండే ఆధార్ కార్డ్‌లపై క్యూఆర్ కోడ్స్ ఉంటాయి. ఇందులో మైక్రోచిప్స్ ఉంటాయి. ఈ ట్యాగ్‌పై ఉన్న క్యూఆర్‌ కోడ్‌పై ఎవరైనా స్కాన్ చేస్తే ఆ కుక్క ఏ వీధికి చెందిందో తెలుస్తుంది. ఎప్పుడైనా అవి ప్రమాదంలో ఉన్నప్పుడో, గాయపడ్డప్పుడో, తప్పి పోయినప్పుడో ఈ కోడ్‌ని స్కాన్ చేసి ఆ ఏరియా అధికారులకు సమాచారం అందించొచ్చు. ఇక పెంపుడు కుక్కలు తప్పిపోయినా వాటినీ ట్రాక్ చేసేందుకు ఈ ఆధార్ కార్డ్‌లు పనికొస్తాయని చెబుతున్నారు ఎన్జీవో సభ్యులు.