Jailer: సారీ చెప్పిన జైలర్.. ఆర్సీబీ ఎగరేస్తుంది కాలర్..

Jailer: నెల్సన్‌ దిలీప్‌కుమార్‌ దర్శకత్వంలో సూపర్ స్టార్ రజనీకాంత్‌ నటించిన సినిమా ‘జైలర్‌’. ఈ చిత్రానికి మంచి టాక్ రావడం, రజనీకాంత్‌ నట విశ్వరూపం చూపించడంతో కలెక్షన్ల వర్షం కురుస్తోంది. జైలర్‌ సినిమా బాక్సాఫీస్ రికార్డులను బద్దలు కొడుతూ పోతోంది. అయితే తాజాగా ఈ సినిమా ఓ వివాదంలో చిక్కుకుంది. ఓ సన్నివేశంలో ఇండియన్ ప్రీమియర్ లీగ్ టీమ్ రాయల్ ఛాలెంజర్స్ బెంగుళూరు జట్టు జెర్సీని ధరించిన ఓ కాంట్రాక్ట్‌ కిల్లర్‌ను రజనీ చంపేస్తాడు.

దీనిపై ఆర్‌సీబీ మేనేజ్మెంట్ అభ్యంతరం వ్యక్తం చేస్తూ.. కోర్టు మెట్లెక్కింది. సదరు సన్నివేశంలో మార్పులు చేస్తామని చిత్ర యూనిట్ పేర్కొంది. సెప్టెంబర్‌ 1లోపు సినిమాలోని సదరు సన్నివేశంలో మార్పులు చేస్తామని జైలర్‌ చిత్ర యూనిట్ తాజాగా కోర్టుకు తెలిపింది. టెలివిజన్‌, ఓటీటీల్లోనూ మార్చిన సన్నివేశాన్ని జత చేస్తామని కూడా హామీ ఇచ్చింది. సెప్టెంబర్ 1 తర్వాత సినిమాలో ఆ సన్నివేశం ఉండకూడదని కోర్టు తన ఉత్తర్వుల్లో పేర్కొంది. దాంతో ఈ వివాదానికి తెరపడింది. జైలర్‌ సినిమా ఆగస్టు 10న ప్రేక్షకుల ముందుకు వచ్చింది. ఇప్పటివరకు రూ.550 కోట్లకు పైగా కలెక్షన్లు రాబట్టింది. ఒక్క తమిళనాడులోనే రూ.175 కోట్లు వసూల్ చేసింది.