పవన్‌ దగ్గర 7 లక్షలు అప్పు చేసిన నాగబాబు

ఏపీ ఎమ్మెల్యే కోటా ఎమ్మెల్సీగా అభ్యర్థిగా జనసేన పార్టీ నేత పవన్‌ కళ్యాన్‌ సోదరుడు కొణిదల నాగబాబు నామినేషన్ దాఖలు చేశారు. కూటమి అభ్యర్థిగా నాగబాబు పేరును జనసేన ప్రకటించగా..

ఏపీ ఎమ్మెల్యే కోటా ఎమ్మెల్సీగా అభ్యర్థిగా జనసేన పార్టీ నేత పవన్‌ కళ్యాన్‌ సోదరుడు కొణిదల నాగబాబు నామినేషన్ దాఖలు చేశారు. కూటమి అభ్యర్థిగా నాగబాబు పేరును జనసేన ప్రకటించగా.. మంత్రులు నారా లోకేష్, నాదెండ్ల మనోహర్, పలువురు ఎమ్మెల్యేలతో కలిసి రిటర్నింగ్ అధికారికి నామినేషన్ పత్రాలు అందచేశారు. నామినేషన్ సందర్భంగా నాగబాబు తన ఆస్తులు, అప్పుల వివరాలు అఫిడవిట్ ద్వారా వెల్లడించారు. అందులో ఆసక్తికర విషయాలు వెలుగులోకి వచ్చాయి. తాను తన అన్నయ్య చిరంజీవి వద్ద, తమ్ముడు పవన్ కల్యాణ్ వద్ద అప్పు తీసుకున్నట్లు అఫిడవిట్‌లో పేర్కొన్నారు. చిరంజీవి వద్ద 28 లక్షలు, పవన్ వద్ద 7 లక్షలు అప్పు తీసుకున్నట్లు చెప్పారు.

మ్యూచువల్ ఫండ్స్/బాండ్ల రూపంలో 55 కోట్ల 37 లక్షలు పెట్టుబడి పెట్టినట్లు చెప్పారు. ప్రస్తుతం తన చేతిలో 21 లక్షల 81 వేల నగదు, బ్యాంకులో 23 లక్షల 53 వేల నగదు ఉన్నాయన్నారు. ఇతరులకు 1 కోటీ 3 లక్షలు అప్పుగా ఇచ్చినట్లు వెల్లడించారు. తన వద్ద 67 లక్షల 28 వేల విలువైన బెంజ్‌కారు, 11 లక్షల 4 వేల విలువైన హ్యుందయ్ కారు ఉన్నట్లు తెలిపారు. 16 లక్షల 50 వేల విలువైన 55 క్యారెట్ల వజ్రాలు, 18 లక్షల 10 వేల విలువైన 226 గ్రాముల బంగారు నగలు ఉన్నాయని చెప్పారు. అంతే కాకుండా 57 లక్షల 9 వేల విలువైన 724 గ్రాముల బంగారం, 21 లక్షల 40 వేల విలువైన 20 కేజీల వెండి తన భార్య వద్ద ఉన్నట్లు తెలిపారు. తనకు, తన భార్యకు ఇద్దరికి కలిపి 59 కోట్ల 12 లక్షల చరాస్తులు ఉన్నట్లు అఫిడవిట్‌లో వెల్లడించారు. రంగారెడ్డి జిల్లాలో వేర్వేరు చోట్ల 3 కోట్ల 55 లక్షల విలువైన 2.39 ఎకరాల భూమి, రంగారెడ్డి జిల్లా టేకులపల్లిలో 53 లక్షల 50 వేల విలువైన 1.07 ఎకరాల భూమి ఉందట.

మెదక్ జిల్లా నర్సాపూర్‌లో 32 లక్షల 80 వేల విలువైన 3.28 ఎకరాలు, అదే ప్రాంతంలో 50 లక్షల విలువ చేసే 5 ఎకరాల భూమి ఉన్నట్లు తెలిపారు. హైదరాబాద్‌ మణికొండలో 2 కోట్ల 88 లక్షల విలువైన 460 చదరపు అడుగుల రెసిడెన్షియల్ విల్లా ఉందని చెప్పారు. మెుత్తంగా 59 కోట్ల చరాస్థులు, 11 కోట్ల స్థిరాస్తులు ఉన్నట్లు నాగబాబు వెల్లడించారు. ఇక అప్పుల విషయానికి వస్తే.. రెండు బ్యాంకుల్లో 56 లక్షల 97 వేల హౌజ్ లోన్, 7 లక్షల 54 వేల కారు లోన్ ఉన్నాయని చెప్పారు. ఇతరుల వద్ద 1 కోటీ 64 లక్షలు అప్పు తీసుకున్నట్లు తెలిపారు. తన అన్న చిరంజీవి వద్ద 28 లక్షల 48 వేలు, తమ్ముడు పవన్ కల్యాణ్ నుంచి 7 లక్షలు అప్పు తీసుకున్నట్లు నాగబాబు తన అఫిడవిట్‌లో వెల్లడించారు. ఇక తనపై ఎలాంటి క్రిమినల్ కేసులు లేవని పేర్కొన్నారు.