Dhoni: ఒక్క విజయంతో ధోని రికార్డు మాయం.. యాషెస్ మ్యాచులో ఎన్ని రికార్డులో

తొలి రెండు టెస్టుల్లో పరాజయం పాలైన ఇంగ్లండ్.. ఎట్టకేలకు మూడో మ్యాచ్‌లో ఆస్ట్రేలియాను ఓడించింది. ఈ మ్యాచ్‌లో ఎన్నో రికార్డులు కూడా క్రియేట్ కావడం విశేషం. లీడ్స్‌లోని హెడింగ్లీ మైదానంలో జరిగిన యాషెస్ సిరీస్‌లోని మూడో టెస్టు మ్యాచ్‌లో ఇంగ్లండ్ టీం ఆస్ట్రేలియాపై 3 వికెట్ల తేడాతో విజయం సాధించింది.

చివరి ఇన్నింగ్స్‌లో 251 పరుగుల విజయలక్ష్యంతో బరిలోకి దిగిన ఇంగ్లండ్ జట్టు 7 వికెట్లు కోల్పోయి థ్రిల్లింగ్ విజయాన్ని అందుకుంది. దీంతో 5 మ్యాచ్‌ల సిరీస్‌ 2-1గా మారింది. ఈ మ్యాచ్ తొలి ఇన్నింగ్స్‌లో ఆస్ట్రేలియా ఫీల్డర్ స్టీవ్ స్మిత్ 5 క్యాచ్‌లు పట్టాడు. దీంతో పాటు టెస్టు క్రికెట్‌లో ఒకే ఇన్నింగ్స్‌లో 4కి పైగా క్యాచ్‌లు పట్టిన రికార్డు స్మిత్‌ పేరిట నిలిచింది. స్టీవ్ స్మిత్ ఇప్పటివరకు 4 సార్లు ఒకే ఇన్నింగ్స్‌లో 4కి పైగా క్యాచ్‌లు అందుకున్నాడు. ఈ మ్యాచ్ తొలి ఇన్నింగ్స్‌లో ఇంగ్లండ్ ఆటగాడు మార్క్ వుడ్ 8 బంతుల్లో 3 సిక్స్‌లు, 1 ఫోర్‌తో 24 పరుగులు చేశాడు. దీంతో పాటు ఇంగ్లండ్ తరుపున 300 స్ట్రైక్ రేట్ వద్ద పరుగులు చేసి మార్క్ వుడ్ ప్రత్యేక రికార్డుగా నిలిచాడు.

ఈ మ్యాచ్ ద్వారా, స్టీవ్ స్మిత్ 100 టెస్టులు ఆడిన ప్రత్యేక రికార్డును సృష్టించాడు. ఈ ప్రత్యేక రికార్డుతో ఆస్ట్రేలియా తరపున 100 టెస్టు మ్యాచ్‌లు ఆడిన 16వ ఆటగాడిగా నిలిచాడు. దీంతో 100పైగా టెస్టు మ్యాచ్‌లు ఆడిన అత్యధిక క్రికెటర్లు ఉన్న దేశంగా ఆస్ట్రేలియా నిలిచింది. అంతకుముందు ఇంగ్లండ్ 15 మంది ఆటగాళ్లతో అగ్రస్థానంలో ఉంది. ఇంగ్లండ్ తుఫాన్ బ్యాట్స్‌మెన్ హ్యారీ బ్రూక్ ఈ మ్యాచ్ 2వ ఇన్నింగ్స్‌లో 75 పరుగులు చేయడం ద్వారా టెస్ట్ క్రికెట్‌లో 1000 పరుగులు పూర్తి చేశాడు. దీంతో అతి తక్కువ బంతులు ఎదుర్కొని 1000 పరుగులు చేసిన రికార్డును బ్రూక్ బద్దలు కొట్టాడు. ఈ ఇంగ్లండ్ బ్యాట్స్‌మెన్ 1058 బంతుల్లోనే ఈ ఘనత సాధించాడు.

టెస్టు క్రికెట్‌లో అత్యధిక సార్లు 250 పైగా పరుగులను ఛేజ్ చేసిన జట్టు కెప్టెన్ బెన్ స్టోక్స్. ఇంతకు ముందు ఈ రికార్డు ధోనీ పేరిట ఉండేది. ఎంఎస్‌డీ నేతృత్వంలో టీమ్‌ఇండియా 4 సార్లు విజయం సాధించింది. ఇప్పుడు బెన్ స్టోక్స్ నాయకత్వంలో ఇంగ్లండ్ జట్టు 5వ సారి 250+ పరుగులను ఛేదించి విజయాన్ని నమోదు చేసింది. దీని ద్వారా నాయకత్వంలో కూడా స్టోక్స్ ప్రత్యేక రికార్డు సృష్టించాడు.