బంతిని తిప్పడంలో తోపు వరుణ్ చక్రవర్తి అరుదైన రికార్డ్

ప్రపంచ క్రికెట్ లో స్పిన్ బౌలర్లంటే గుర్తొచ్చేది టీమిండియానే... బిషన్ సింగ్ బేడీ, అనిల్ కుంబ్లే, హర్భజన్ సింగ్, రవిచంద్రన్ అశ్విన్ ఇలా ఎంతోమంది దిగ్గజ స్పిన్నర్లు ప్రపంచ క్రికెట్ ను ఏలేశారు. వారి వారసత్వాన్ని కంటిన్యూ చేస్తూ పలువురు యువ స్పిన్నర్లు సత్తా చాటుతున్నారు.

ప్రపంచ క్రికెట్ లో స్పిన్ బౌలర్లంటే గుర్తొచ్చేది టీమిండియానే… బిషన్ సింగ్ బేడీ, అనిల్ కుంబ్లే, హర్భజన్ సింగ్, రవిచంద్రన్ అశ్విన్ ఇలా ఎంతోమంది దిగ్గజ స్పిన్నర్లు ప్రపంచ క్రికెట్ ను ఏలేశారు. వారి వారసత్వాన్ని కంటిన్యూ చేస్తూ పలువురు యువ స్పిన్నర్లు సత్తా చాటుతున్నారు. తాజాగా భారత స్పిన్నర్ వరుణ్ చక్రవర్తి బంతితో అదరగొడుతున్నాడు. దేశవాళీ క్రికెట్ అయినా, అంతర్జాతీయ సిరీస్ లు అయినా తన స్పిన్ మ్యాజిక్ చూపిస్తున్నాడు. బంతిని తిప్పడంలో తోపుగా కితాబు అందుకుంటున్నాడు. తాజాగా ఇంగ్లాండ్ తో సిరీస్ లో మిస్టరీ స్పిన్నర్ వరుణ్ చక్రవర్తి చరిత్ర సృష్టించాడు. ద్వైపాక్షిక టీ20 సిరీస్‌ల్లో 10 అంతకంటే ఎక్కువ వికెట్లు తీసిన తొలి భారత బౌలర్‌గా చరిత్రకెక్కాడు. ఇంగ్లండ్‌తో ఐదు టీ20ల సిరీస్‌లో భాగంగా రాజ్‌కోట్ వేదికగా జరిగిన మూడో టీ20లో వరుణ్ చక్రవర్తి ఐదు వికెట్ల ఘనతను అందుకోవడం ద్వారా ఈ ఫీట్ సాధించాడు. తొలి టీ20లో 3 వికెట్లు తీసిన వరుణ్ చక్రవర్తి రెండో టీ20లో 2 వికెట్లు పడగొట్టాడు.

సౌతాఫ్రికా పర్యటనలోనూ 4 టీ20ల్లో 12 వికెట్లు తీసుకున్నాడు. ఈ జాబితాలో వరుణ్ చక్రవర్తి తర్వాత అశ్విన్, రవి బిష్ణోయ్ ఉన్నారు. శ్రీలంకతో 2016లో అశ్విన్ 9 వికెట్లు తీయగా.. రవి బిష్ణోయ్ 2023లో ఐర్లాండ్‌తో సిరీస్‌లో 9 వికెట్లు పడగొట్టాడు.ఈ సిరీస్‌లోనూ వరుణ్ చక్రవర్తీ ఐదు వికెట్ల ఘనతను అందుకున్నాడు. దాంతో అంతర్జాతీయ టీ20ల్లో రెండు సార్లు ఐదు వికెట్ల ఘనతను అందుకున్న మూడో భారత బౌలర్‌గా నిలిచాడు. వరుణ్ చక్రవర్తి కన్నా ముందు భువనేశ్వర్ కుమార్, కుల్దీప్ యాదవ్ ఈ ఫీట్ సాధించారు. యుజ్వేంద్ర చాహల్, దీపక్ చాహర్ చెరోసారి ఐదు వికెట్ల ఘనతను అందుకున్నారు.

ఐపీఎల్ 2024 సీజన్‌లో కోల్ కత్తా నైట్ రైడర్స్ తరఫున 21 వికెట్లు పడగొట్టిన వరుణ్ చక్రవర్తి.. ఆ జట్టు విజేతగా నిలవడంలో కీలక పాత్ర పోషించాడు. విజయ్ హజారే ట్రోఫీ లో 19 వికెట్లు పడగొట్టి మళ్లీ టీమిండియాలోకి రీఎంట్రీ ఇచ్చాడు. తన రీఎంట్రీలో 10 మ్యాచ్‌ల్లోనే వరుణ్ చక్రవర్తి 27 వికెట్లు పడగొట్టాడు. అతని యావరేజ్ 10.96గా ఉండగా ఎకానమీ 7.40 ఉంది. అయితే ఈ మ్యాచ్ లో వరుణ్ చక్రవర్తి అదరగొట్టినా భారత్ కు ఓటమి తప్పలేదు. బ్యాటర్ల వైఫల్యంతో టీమిండియా మూడో టీ ట్వంటీలో పరాజయం పాలైంది. ఇంగ్లాండ్ ను 171 పరుగులకే కట్టడి చేసినా.. ఛేజింగ్ లో భారత బ్యాటర్లు చేతులెత్తేశారు. ఫలితంగా భారత్ 145 పరుగులకే పరిమితమైంది. ప్రస్తుతం ఐదు మ్యాచ్ ల సిరీస్ లో భారత్ 2-1 ఆధిక్యంలో ఉండగా.. నాలుగో టీ ట్వంటీ పుణే వేదికగా శుక్రవారం జరుగుతుంది.