సత్యాగ్రహం (ఆందోళన)తోపాటు రైల్వేలో ఉద్యోగం చేయాల్సిన బాధ్యత కూడా తమపై ఉందని సాక్షి మాలిక్ తెలిపారు. తాను విధి నిర్వహణ కోసమే రైల్వేల్లో తిరిగి విధుల్లో చేరుతున్నట్లు చెప్పారు. అంతేకానీ.. ఉద్యమం నుంచి బయటకు వెళ్లడం లేదన్నారు. మరోవైపు భజరంగ్ పునియా కూడా ఇదే తరహా ప్రకటన చేశారు.
ఇంతకాలం నిరసనల్లో కీలకంగా ఉన్న సాక్షి మాలిక్ ఈ నిరసనల నుంచి తప్పుకొంటున్నట్లు ప్రకటించింది. అయితే, ఉన్నట్లుండి సాక్షి మాలిక్ ఈ నిర్ణయం తీసుకోవడానికి గల కారణాలు మాత్రం తెలియలేదు.
నిన్నటివరకు అసలు స్పందించని బీజేపీ సహా వివిధ రంగాల ప్రముఖులు ఒక్కొక్కరుగా రెజ్లర్లకు మద్దతిస్తున్నారు. రెజ్లర్లకు తగిన న్యాయం చేయాలని డిమాండ్ చేస్తున్నారు. బీజేపీకి చెందిన కేంద్ర మంత్రి అనురాగ్ ఠాకూర్, బీజేపీ మహిళా ఎంపీ ప్రీతమ్ ముండే (మహారాష్ట్ర) రెజ్లర్లకు మద్దతు తెలుపుతూ మాట్లాడారు.
రెజ్లింగ్ ఫెడరేషన్ ఆఫ్ ఇండియా (డబ్ల్యూఎఫ్‌ఐ) అధ్యక్షుడు బ్రిజ్ భూషణ్ శరణ్ సింగ్‌ తమను లైంగిక వేధింపులకు గురి చేశాడని పలువురు రెజ్లర్లు ఆరోపించారు. అతడిపై చర్యలు తీసుకోవాలని, అలాగే పదవి నుంచి తప్పించాలని వాళ్లు డిమాండ్ చేస్తున్నారు.
