శ్రీకాకుళం (Srikakulam) జిల్లాపై మంచి పట్టు ఉన్న నాయకుల్లో ధర్మాన ప్రసాద్‌ రావు (Dharmana Prasad) ఒకరు. నిజానికి ఆ జిల్లా నుంచి చాలా కాలంగా వైసీపీకి ఒక అసెట్‌గా ధర్మాన ఉన్నారు. కానీ అలాంటి ధర్మాన ఇప్పుడు ఏకంగా ప్రత్యక్ష రాజకీయాల నుంచి వైదొలగాలని నిర్ణయించుకున్నట్లు తెలుస్తోంది.
అభ్యర్థి ఎంపిక, టిక్కెట్‌ కేటాయింపు మీదే ఏ పార్టీకైనా సగం గెలుపు ఆధాపడి ఉంటుందన్నది రాజకీయ అనుభవం ఉన్నవాళ్ళు చెప్పే మాట. సాధారణ పరిస్థితుల్లో ఆ సిద్ధాంతాన్నే నమ్ముతాయి అన్ని పార్టీలు. ఆంధ్రప్రదేశ్ లోని శ్రీకాకుళం లోక్‌సభ సీటు విషయంలో ఆ సంగతిని సరిగా పట్టించుకోక దెబ్బతిన్నామన్న అభిప్రాయం ఇప్పుడు వైసీపీ అగ్రనాయకత్వానికి కలుగుతోందట. అందుకే ఈసారి దిద్దుబాటు కార్యక్రమం మొదలుపెట్టినట్టు పార్టీ వర్గాల్లో చర్చ జరుగుతోంది.
