అనితా.. ఓ అనితా అనగానే వెంటనే గుర్తుకు వచ్చేది ఒక లవ్ ఫెయిల్యూర్ సాంగ్. ఈ పాట రాసింది ఎవరో తెలియకున్నా.. ఆ పాట మాత్రం ఇంతింతై వటుడింతై దానిపైనంతై అన్నట్లుగా ఖండాలు, దేశాలు, ఎల్లలు దాటి వెళ్లిపోయింది. బహు ప్రాశస్థ్యం పొందింది. ఆపాట వినేందుకు ఎంత కమ్మగా ఉన్నా.. దాని వెనుక మాత్రం కనిపించనంత శోకం దాగి ఉంది. ఆ శోకపు జ్వాల చల్లారకముందే.. కాలం మరో రూపంలో సుడిగుండాల హోమానికి ఆజ్యం పోసింది. ఇంకేముంది ఈ పాటకు జీవంపోసిన అతని జీవితంలో అనేక ప్రచండ శక్తులు తోడయ్యాయి. దీంతో యుద్దం చేసేందుకు అస్త్రాలు నాగరాజు దగ్గర లేవు. అటు ప్రేమించిన మహిళ.. ఇటు నమ్ముకున్న కళ.. ఇతని జీవితాన్ని కకావికలం చేసింది. ఈ విషాద సాగరం నుంచి కోలుకొని హూస్సేన్ సాగర్ తీరాన ఉన్న హైదరాబాద్ లో తిరిగి నివసిస్తూ మరిన్ని అవకాశాలను అందిపుచ్చుకుంటున్నారు. అనిత ప్రేమాయణం నుంచి సగటు జీవి సాధారణ ప్రయాణం సాగిస్తున్నాడు. అదే క్రమంలో అనిత పార్ట్ 2 అంటూ సరికొత్త లిరిక్స్ తో సంగీత ప్రియులను ఉర్రూతలూగించేందుకు సిద్దం అయ్యారు. ఈ మట్టిలో మాణిక్యం ఇన్నాళ్లు ఏమైపోయారు.. అసలు ఈ లవ్ స్టోరీ ఏంటి.. ఇప్పుడు ఏం చేస్తున్నారు.. అనే మొత్తం వివరాలు చదివేద్దాం.
