వన్డే వరల్డ్‌కప్‌లో సత్తా చాటిన ఈ సీనియర్‌ పేసర్‌ కోసం వేలంలో ఫ్రాంఛైజీలన్నీ పోటీ పడితే.. కోల్‌కతా నైట్ రైడర్స్ ఏకంగా 24.75 కోట్లకు భారీ మొత్తానికి సొంతం చేసుకుంది. దీంతో ఈ సీజన్‌లో అతనిపై భారీ అంచనాలు నెలకొన్నాయి.
ఆస్ట్రేలియాకు చెందిన మిచెల్ స్టార్క్.. IPL చరిత్రలో అత్యంత ఖరీదైన ఆటగాడిగా అదిరే రికార్డు సృష్టించాడు. మిచెల్ స్టార్క్‌ను కోల్‌కతా నైట్ రైడర్స్ ఏకంగా రూ.24.75 కోట్లకు కొనుగోలు చేసింది.
ఐపీఎల్ సీజన్ 17 వేలం కోసం తమ పేర్లను నమోదు చేసుకున్న స్టార్ ఆటగాళ్ల జాబితాలో ఆస్ట్రేలియా స్పీడ్‌ స్టార్ మిచెల్ స్టార్క్ పేరు అగ్రస్థానంలో ఉంది. ప్రపంచంలోనే అత్యుత్తమ లెఫ్టార్మ్ పేసర్లలో ఒకరిగా గుర్తింపు పొందిన స్టార్క్.. 8 ఏళ్ల తర్వాత మళ్లీ ఐపీఎల్‌లో సందడి చేయాలని నిర్ణయించుకున్నాడు.
అమెరికా, వెస్టిండీస్‌లో జరిగే టీ20 ప్రపంచకప్‌ టోర్నీకి ఐపీఎల్ మంచి సన్నాహక మ్యాచులుగా మారుతాయని స్టార్క్ భావిస్తున్నాడు. ఈ క్రమంలోనే 8 ఏళ్ల తర్వాత ఈ లీగ్‌లో ఆడాలని, 'విల్లో టాక్' పోడ్‌కాస్ట్‌తో చెప్పుకొచ్చాడు.
