విజయవాడ ఎంపీ కేశినేని నానికి పొమ్మనలేక పొగబెట్టింది టీడీపీ అధిష్టానం. దాంతో ఆయన ఇప్పుడు కొత్త పార్టీని వెతుక్కునే పనిలో ఉన్నారు. కానీ టీడీపీలోనే కొనసాగుతున్న ఆయన కేడర్ మాత్రం అయోమయంలో పడ్డారు. గతంలో నాని అండ చూసుకొని.. పార్టీ ఇంఛార్జుల మీద రెచ్చిపోయిన వాళ్ళంతా ఇప్పుడేం చేయాలని అయోమయంలో ఉన్నారు.
బెజవాడ ఎంపీ సీటుపై దాదాపు ఏడాదిన్నర నుంచి నలుగుతున్న వ్యవహారానికి తెరదించింది టీడీపీ అధినాయకత్వం. సిట్టింగ్ ఎంపీ కేశినేని నానికి టికెట్ ఇవ్వడం లేదని క్లారిటీ ఇచ్చేసింది. నేరుగా చెప్పకున్నా.. ఆయన సోదరుడు చిన్నికి లైన్ క్లియర్ చేసింది. దీంతో ఇదే విషయాన్ని సోషల్ మీడియా వేదికగా ప్రకటించారు నాని. దీంతో కొందరిలో రిలీఫ్ కనబడినా.. నాని స్వభావం తెలిసినవారు.. ఆయన్ను దగ్గరుండి చూసిన వారిలో మాత్రం భవిష్యత్తులో బాంబ్‌ బ్లాస్ట్ ఖాయమన్న అభిప్రాయం వ్యక్తం అవుతోంది.
టీడీపీ అధినేత చంద్రబాబుతో విభేదాలతో ఆ పార్టీని వీడాలని విజయవాడ ఎంపీ కేశినేని నిర్ణయించారు. త్వరలోనే ఎంపీ పదవికి, టీడీపీకి త్వరలో రాజీనామా చేస్తానని ట్వీట్ చేశారు. తిరువూరులో అన్నదమ్ములు కేశినేని నాని-చిన్ని మధ్య విభేదాలు తీవ్రం కావడంతో చివరకు పార్టీని వీడాలని నాని నిర్ణయించారు.
